「萬里敦煌道，走馬看不停」

 琴晚因為內地航空管制，Delay到晚上9點幾先正式起飛，抵達深圳已經係凌晨12點幾。我地只可以經24小時通關嘅皇崗口岸過關返香港，返到粉嶺嘅屋企已經凌晨2點半，加上今朝要上8半堂，於是急忙沖個涼食個杯麵就即刻訓教。雖然呢次旅程已經完左，但之前一直因為內地網絡問題、同行程途中想專心遊覽，而未有同大家分享其他旅程中有趣嘅事情、買票、來回交通呢啲實用性資訊等等，所以我地都會Keep住出Post，同埋整理呢幾日嘅精彩時刻，剪成片段同大家Share！記得睇我地個Page呀～

 找數真漢子第二回！Campfire之鬼跳起狂歡來。係沙漠露營果陣，一見到佢地起左個野火堆就馬上飛奔過去自己跳狂歡，無錯係自己跳，然後馬來西亞嘅朋友淨係笑笑口睇我跳，完全唔知我做乜無啦啦聞歌起舞，後來先同佢地解釋香港大學生搞迎新營會同新生一齊跳campfire呢個傳統。一邊跳一邊比啲柴火嘅煙攻到眼淚一直流，嗚嗚沙漠真火Campfire都係人生第一次。

本身計劃睇雅丹日落，但今日天氣麻麻，有舊烏雲擋住左太陽。師傅叫我地快快入去睇下啲地貌見識下就走回程搏係戈壁灘睇日落。於是我地就去左買飛搭5點30分班車入去睇，但睇雅丹地貌途中因為天氣不定、有其他同車嘅遊客遲上車而延遲左回程嘅時間。
我地睇完雅丹地貌之後，就同趙師傅馬上開車打道回府，當時係6點45分左右，個天仲好光，因為黎左幾日敦煌呢邊日日都8點幾先日落入黑。師傅沿途一路揸車，ceci閉目養神，我就一路睇風景，窗外面有一片灰灰黑黑嘅幕，當時距離真係好遠下，一直以為果邊落緊大雨。本身趙師傅都以為係雨，點知架車一直駛一直駛，見到原本係對面灰灰黑黑嘅一片幕愈黎愈近，先知係沙塵暴！加上條路有限速，但係都睇得出就算開幾快都好，其實都無可能走出個沙塵暴，因為個範圍真係太廣。
其實係呢次沙塵暴之前，係雅丹地貌都經歷左一場小風沙（相對沙塵暴而言）。呢次黎敦煌嘅見識同體驗實在係令人動魄驚心，由個沙塵暴打緊黎、打到黎、身在其中、走出困境，都有太多太多嘅感受經歷體會，暫時未能一一詳述。今日可以話我地唔幸運，但都可以話我地係好幸運，唔幸運係遇到沙塵暴，幸運都係遇到沙塵暴，有一個難得嘅人生體驗，期間大家可以冷靜應對，互相合作，最終可以大步攬過，平安返到民宿，最終我地10點返到民宿。依家要好好休息下，大家唔洗擔心！

到左蘭州寄存埋行李，因為晚機嘅關係，我地會係蘭州走一走。肚仔餓去左間老字號食牛肉麵，叫馬子祿牛肉麵。8蚊碗牛肉麵邊度搵，雖然得牛肉粒，我果碗得2粒仔，ceci果碗多啲，但個麵係好食嘅！肉唔夠，可以order一份牛肉，都係8蚊一份，係牛肉片，好好食！呢度人均消費$16蚊，就食到師傅手拉牛肉麵。我地發現唔少本地人都會嚟呢到食，相信係正宗老字號。

終於去到榆林窟，師傅開到120/km都要2個半鐘先到。學生飛半價$20，門票價錢極抵，但其實性價比無網上講得咁高。可能係我地已經花光所有運氣去遇見沙塵暴同埋沙漠露營！因為包車價錢都要$400人仔，除返開仲貴過睇莫高窟。但佢有兩樣野真係好過莫高窟嘅，一係人真係少好多（1次導賞團10個人左右，不過我都係覺得10都係太多太多，因為網上講到無人去咁，期望太高

之前都同大家提及過敦煌號，今晚我地搭敦煌號出返蘭州，聽晚轉機返深圳返香港啦。敦煌號嘅車廂除左係比想像中舒服同乾淨之外，仲有個政策叫換票。車務員會逐間逐間收車票，然後換張硬卧證、軟卧證比你，到你要到達你嘅目的地之前會黎叫醒你比返張票你，換返佢一開頭比你嘅證。我地估，佢地咁做係包裝左查票呢件事，唔洗驚嘅人買平嘅車票搭去遠嘅地方，同時又比人覺得好貼心！

敦煌呢邊日出時間係7:00 - 7:30呢段時間，係沙漠露營夜晚睇星星，日頭緊係睇日出啦！7點一直坐係沙漠度睇住太陽升起，沙漠由暗變光，光變更光，照出沙漠高高低低唔同嘅影，真係好靚好靚。睇完日出，就飛左轉沙漠越野車，超爽、超快，快到頂Cap都飛走左，要兜返轉頭執！同一團去沙漠露營嘅都係馬來嘅朋友，夜晚圍住野火同當地人一齊飲啤酒玩酒Game，聽佢地講自己旅行嘅故事，分享我地身在沙塵暴中心嘅感受，仲有好好食嘅真·土匪雞翼、烤羊串，真係諗起都回味。今日係係敦煌嘅最後一日，因為沙塵暴之後果日我地留左係市內休養生息，無去到榆林窟，心入面一直好想去，就趁今日去埋！又食左轉羊肉粉湯（真係極好食唔是講笑）又出發啦我地。

最後一晚係敦煌，我地轟左去東戈壁灘露營！同一班來自馬來西亞嘅朋友一齊入去。身處係大漠入面，聽風聲、睇日落、滑沙、坐沙灘越野車、食羊肉串燒，好正呀呀呀呀呀呀！

作感冒，但藥入面居然無收鼻水止咳藥，唯有去藥房買啲成藥頂住先。點知係店員專登咁講啲藥嘅時候，竟然比我地聽到Campfire之歌「成吉思汗」，於Campfire 之鬼即時聞歌起舞！

呢間蘭州牛肉麵，即叫即拉即煮，點左紅燒牛肉麵同加肉牛肉麵之後，師傅就即刻拉麵。啲麵條彈牙好食，牛肉都好正，有肉香！兩碗麵收$36蚊人仔，我地都幾肯定係比人劏，因為呢間野係包車師傅趙叔叔成日食嘅，細碗只需$6蚊人仔！但係我地個餐牌就係每碗貴3倍，都係香港好，有咩可以報消費者委員會，係呢度你食就一個字唔食就兩個字，基乎無時無刻都比人劏，因為世界都知道你係外賓（比遊客的可劏性更高，與外國人同等Lv）

今日走敦煌西線，唔想去電視城嘅我地直接飛左敦煌古城，去西千佛洞。唔去唔知呢個洞性價比極高，琴日睇完莫高窟，評價真係人太多逗留時間太少，而門票學生飛都要$120人仔，今日西千佛洞學生飛只係$15人仔，睇5個洞窟。人唔多，講解員講得詳細啲生動啲，同壁畫佛像距離亦都近好多，而且唔少壁畫仲睇到顏色。其中一個洞窟佛陀背後嘅壁畫保留左藍色、湖綠色，導賞員話呢啲顏色可以保留落黎，係因為當時嘅顏料用寶石磨成粉再調配而成。而當時，敦煌人只需要用普通食糧如番茄、紅蘿蔔就可以換得到，現在就不行了。

敦煌係中國少數無咩工業發展嘅城市，水土都相對好，加上日照時間長，可以種出好生果。叔叔就係我地參觀嘅時候去摘提子比我地食！好食到食唔停！宜家仲長埋我地去佢朋友到摘提子！

雖然係敦煌都係6點鐘，但其實似香港嘅3點、4點。趁天仲光，我地係民宿出發行咗大約10分鐘就到左鼎鼎大名嘅鳴沙山，感受大漠嘅風采。踏足呢個沙山嘅第一個感覺就係：行一步退三步。我地試過唔跟住堆滿人嘅上坡路徑行，直接行上沙山，但係行左好耐都上唔到頂，無論幾用力行，腳下嘅沙都會流走，將我地拉後，加上烈日當空，成個人出晒汗，頭又痛，好絕望！呢個moment令我諗返起一套80年代中日合拍片「敦煌」，戲嘅開頭就講過係大漠入面行走要做好死嘅準備，沙漠就好似魔鬼咁不斷消磨人嘅意智。於是我地抱住往死裏死裏去嘅精神爬上頂。而係望返落去嘅景真係好正，唯一唔好就係太多人，而佢地講野都好大聲。

瞓瞓下聽到好嘈，有野俾人拖拉，警覺性好高嘅我即刻爬起身望一望對面，居然見到一包野自己係到郁，驚到我呢... 之後望真啲有條尾，我一個反應係有老鼠！於是我即刻拍醒瞓死左嘅沈嘉儀！開燈之後發現原來係隻小貓係窗邊跳左入黎，仲想偷左我地隻雞脾。最後，我地決定比左隻脾佢，佢先肯走。一個鐘後，佢又跳返入黎，今次佢無偷野，就坐係床上係咁喵喵叫，好嘈！

行完三危山，諗住趙師傅應該都會車我地返客棧啦，點知佢途中問我地去唔去睇古墓，話個古墓係西晉時期，見我地咁中意歷史野就推薦一下，平時好少遊客去呢啲地方參觀。一聽到係古墓，又少遊客就點都話去睇啦。趙師傅就車我地經過好多小墳嘅路，師傅話兩邊果啲係現代人嘅墓地，指住前面五星紅旗飄飄嘅地方話果度先係目的地。去到西晉古墓差啲就自己轟左入去，記住大陸任何景點都要買飛，買飛一定要問有無學生飛，原價$30，減到$20一張飛。
買完飛課完金，導賞員拎住個手電筒就帶我地去睇兩個古墓，一個係西晉時期，另一個係東漢時期。由古墓結構推算返當時社會形態思想，以及墓主嘅身份地位。西晉古墓深12米，用石片石磚做成拱形墓地，無加任何水泥或者固定物，每塊石磚都有畫像，比如伏羲女媧（代表佢地的信仰）、大力士（代表佢地對力量的崇尚）四方神獸（代表方位以及有鎮守墓地之意）、牛羊馬鹿（代表墓主生前擁有財產），甚至有一對守門人的畫像，走入墓室見到有佢地嘅糧倉、耳室、廁所等間格，完全反映出古人「死後如生前」嘅概念，為死後世界建構如同生前嘅生活。

三危山就係莫高窟隔離，點解會有莫高窟都係因為三危山，同大家講個故事：從前有座山，山上有和尚，然後就有左莫高窟啦。個和尚企係三危山望向依家莫高窟所在地，見到佛光閃閃，於是開始打造石窟，後來每個朝代都有人一齊修建石窟。
而三危山，趙師傅話平時係無人去嘅，佢地當地人只會係佛誕先會上三危山焚香禮佛。今日上到去，沿途兩邊都係寸草不生嘅石山，經過左觀音井（趙師傅話相傳飲左啲井水無仔生嘅變有仔生，有仔生嘅變生男生女任君選擇），又睇左西王母廟同龍王廟，呢兩座廟都係道教為主，又係一個佛道並存嘅地方，聽趙師傅講，敦煌係佛教聖地，但其實都存在好多民間宗教，無話特別佛教一家；道教一家，好多時對於佛學嘅認識都係由上一輩口耳相傳流傳落黎，唔似香港有宗教嘅辦學團體營運一間學校比學生學習宗教知識，佢仲話依家呢輩嘅年輕人已經唔信了。趙師傅一路長驅直入去到盡頭，就係一尊金身大佛，高26米，佛光照耀整個三危地區，甚或是敦煌。大佛嘅正對面係南山寺，入面供奉唔同嘅佛同菩薩，大雄寶殿入面嘅佛陀就正對外面嘅金身佛陀。走入三危山，外面只有呼呼風聲同旗幡被吹得搖曳嘅聲音，走入寺廟特別寧靜，所謂佛門清淨地，今日完全見識到。

朝早睇完數碼影視中心嘅小電影之後，坐擺渡車（即穿梭大巴）去莫高窟。依家都仲係莫高窟嘅旺季，所以入面都係人頭湧湧，除左我地呢啲散客，仲有一團一團嘅旅客！因為我地提前一個月係網上訂飛（學生飛有半價，趁仲係學生好快啲去旅行），可以參觀8個洞窟，如果無訂到飛，要係當日晨早去排應急飛，就淨係可以參觀4個窟。其實8個窟真係唔夠喉，因為人多，停留嘅時間好短。今日我地睇左94、96、100、259、16、17呢幾個窟（仲有兩個唔記得左），其實每個石窟入面嘅壁畫同佛像都好靚，加上導賞員嘅講解令到我地更清楚。94窟係個佛道合一嘅窟，點解咁講呢？係清代之前，94窟仲係一個佛窟，入面有佛陀同埋佢兩個弟子（應該係阿難同迦葉），四周牆壁都畫滿壁畫，有飛天等等，頂上嘅蓮花就象徵佛教出淤泥而不染。睇到黎呢度都未有道教，點算係佛道合一呢？清朝王圓祿道士發現莫高窟，佢想供奉太上老君，於是命人打造左個太上老君雕像放左係佛陀前面一齊供奉。成日都講儒釋道合流，呢個係個幾有趣嘅洞窟就體現左佛道並存嘅局面，所以同大家分享下。

岩岩係莫高窟嘅數碼影視中心睇完兩條小電影，一條係關於敦煌同莫高窟嘅歷史；一條係關於莫高窟嘅洞窟。我地係球幕影院睇有關莫高窟洞窟，條片非常精彩，展示左唔同洞窟入面嘅情況，佛像、飛天如在眼前，配合360度全景拍攝技巧，睇到大家嘩嘩聲，入面啲遊客係真係嘩嘩嘩咁嘩出聲！不過自細就去慣香港太空館嘅我地非常淡定，慢慢欣賞影片同仔細咁聽佢個簡介，一向都知道佛教講求因緣果報，前世作業種下嘅因，今世就會有業報，大家可能未必知釋迦牟尼嘅前世係點，係條片度就有講解到佛陀前世係王子，出遊時見到飢餓嘅老虎，不忍其飢餓而捨身飼虎，黎來比人建塔供養。到下一世，因為佛陀前世種下善因，先得以成佛的善果。

今日訂左莫高窟9:30門票，包車師傅趙叔叔帶我地去食敦煌早餐，本身想去夏家合汁食羊肉粉條，點知去到發現間野執左。於是馬上轉左去食小籠包同稀飯，都係當地人會經常食。唔同地方嘅小籠包，都有佢地唔同嘅地方，敦煌嘅小籠包一籠10粒全部漲卜卜，係包子厚皮帶肉，食落去同香港皮薄爆汁嘅小籠包完全唔同，反而似係小菜肉包，佢地都會溝乾辣椒粉同黑醋點黎食，食完一粒覺得幾正，忍唔住食食食，啪左大半籠！稀飯就係小米粥，應該有啲粟米係度所以煮出黎係淡黃色嘅，唔咸唔淡可以完美形容佢，清清淡淡嘅粥同濃味嘅包子互相配合。後來叔叔話可以加沙糖食。加完之後，變到甜甜地好食左好多，又即刻飲哂成碗小米粥。我地依家出發去莫高窟啦，好期待呀！

人很好的民宿呀姨琴日請我地食瓜，食西瓜同棗子！她說敦煌這兒乾燥，吃塊瓜比較沒那麼乾燥。的確，敦煌好乾燥，呢個月份雖然天氣唔熱，但我地日飲超過4L水都唔夠保濕，可想而知有幾Dry。黎敦煌嘅朋友，記得準備好保濕啦！

正所謂，有人嘅地方就有史，歷史嘅史呀講緊～我地睇有關敦煌嘅書同Paper時發現敦煌呢個地方曾經比唔同嘅民族揸過大旗。
最早最早嘅記錄係上古堯舜時期，根據《尚書》​​記載：「流共工於幽州，放獾兜於崇山，竄三苗於三危，殛鯀於羽山，四罪而天下咸服。」三苗部落因為打輸左仗不服反抗，而被堯舜為首嘅中原部落流放到三危，成為左敦煌史上最早嘅居民。《通典・沙州條》亦云：「沙州，昔舜流三苗於三危，即其地也。其後代子孫為羌戎，代有其地。」三苗同佢地嘅後裔羌戎就一直住係敦煌過住採集、狩獵為生嘅游牧生活啦。
不過人係唔會一成不變嘅，只要佢有腳，佢就會行黎行去彈出彈入，所以每個地方嘅人都處於一個不斷嘅遷徙融合嘅情況。有時候彈左入人地個界線度，就分分鐘會開火，贏嘅一方就吞併輸嘅一方。去到戰國時期，月氏、塞種胡、烏孫呢三個民族就係敦煌一帶活動，以月氏所擁有嘅火力最為強大，月氏族人嘅野心同佢擁有嘅火力一樣咁大，所以一開火佢就將三苗後裔羌戎吞併，趕走左塞種胡、烏孫兩個民族，掌控10萬兵力，稱霸河西。
直到秦漢時期匈奴嘅力量不斷壯大，擁有30萬兵力嘅匈奴愛鬥大，又將月氏趕走，成功入主敦煌！而鮮卑、吐蕃、回鶻、黨項、蒙古都有係敦煌活動或者住過，一直到西漢漢武帝大破匈奴，先將敦煌呢個地方收入西漢版圖，漢武帝都即刻將中原唔同嘅大姓遷入敦煌，如張姓、索姓等。之後唔同嘅朝代至現今都來自有不同地方嘅人遷入敦煌。
三危？沙洲？敦煌？呢幾個係咩地方？如果想知，記得睇下個Post，科科。

訓完了覺回一回氣就出發去市中心閒逛一下，錯過左公車嘅我地搭上左沿途撩我地嘅呀姨⋯⋯嘅的士。本來打算去食達記驢肉麵，呀姨搭左句呢間網上評價唔錯，喜歡同當地人搭訕嘅我地問左句你有無推薦，我地想試在地人先食嘅！呀姨馬上化身導遊一邊同我地指路簡介反彈琵琶像、沙洲夜市，另一邊就介紹在地人先食嘅卜記驢肉麵比我地！
第一啖有啲唔慣，食食下就覺得好好食，驢肉無論外貌定口感都似牛肉，黃麵嘅口感一如香港嘅油麵！無乜野我都係繼續食麵啦，因為真係好大份！

清晨6點幾就到達敦煌啦！黎到敦煌第一件好人好事就係包車司機趙師傅嘅勁熱情款待，一早黎接我地火車送我地到民宿。依家嘅我地已經係民宿入面，經過一晚火車舟車勞頓，我地決定訓陣先再出發係市中心鳴沙山月牙泉走走。
利申係天氣方面我地又係完全錯估形勢，得13度，好彩帶多左件褸，最後無事！呢度嘅13度唔係香港冬天極凍嘅溫度，而係有種涼風輕輕吹嘅感覺，幾舒服。不過睇怕我地帶嘅小背心就著唔到上身了。

本身我地買左硬卧，但因為琴日瞓太少，所以想對自己好少少upgrade去軟卧。結果，無中國戶口又無支付寶嘅我地就無得換票。不過好彩，硬卧都好舒服！同埋同房嘅廣西呀姨呀伯都好好人。宜家好期待沿途風景！

係深圳機場Delay左兩個鐘，原定12點會到蘭州變左2點先到。一落機心諗點解呢個機場冷氣開到咁大嘅，出面鬼死咁大個太陽出到去會唔會好熱呢？事後發現，我地有啲錯估形勢，根據手機天氣預報，蘭州當地現時得16度，並唔係機場開得大冷氣，而係機場根本唔需要開冷氣都夠哂涼，唔知敦煌果邊天氣又點呢？到左再update大家